الشاعر .. أحمد كريم

عاتب
------------------
 عاتب عليك يازمن
والقلب منَّك شايل
ياما قلوب تؤتَمن
وعملت فيها عمايل
عَلِّيت الواطى لفوق
مع أنُّه كان مايل
وانا اللي كنت مليح
ولسانى كان قايل
رُوحت ف مهَب الريح
ودمع العيون سايل

----------------- 


كورباج ورا ياسطَى
---------------------------------
كورباج ورا ياسطَى
فيه ناس راكبين هنا بَلُّوشى
يظهر راكبينها بالواسطه
ولا خَدوا تصريح ولا مُخ مَليح
عايشينها أوانطه في أوانطه
كورباج لشوية هبِّيشه
خطفوا من الناس التحويشه
وسابولهم في القلب زغُطَّه
كورباج لخروف ماشي يمأمأ
فُتّولُه الفتَّه وبيسأسأ
مستَنِّى يشوف آخر نَطَّه

------------------------------

 
شَقشَق
------------------------------------
عكروت من العكاريت
صايع ومِتدَقدَق
أشطر من العفريت
واسم البعيد شقشق
حَفَر فى بطنُه الجوع
مصارينُه بتزَقزَق
حِلِف لايعمل بيه
يعنى هايحصل إيه
حافى بقالُه سنين
واكعابُه بتشَقَّق
وكلُّه بالفهلوه
والقرش كان هَمُّه
يمسح فى جوخ بهوات
ويطاطى ولاهَمُّه
يسهر مع الواصلين
ده سيدُه وده عَمُّه
عَدَّى سنه واتنين
أصبح من الكُبارات
ورِجلُه بعد الحَفا
لبسِت حذاء برباط
علي بابا بعد الضنا
لابس حرير في حرير
شقشق يدوق الهنا
عايش في قصر كبير
حواليه شقاشِق ياما
من نفس عَيِّنتُه
بيمسحولُه الجوخ
وبيلعنوه ف غيبتُه

*****