----------------------------------
منمنمات...ومكسَّرات
ونفوس في حيرَه مُذَبذَبات
وناس بتدِّى وناس بتاخُد
وناس ماتعرف غير بس هات
وناس بريئه وناس جريئه
وناس بتبكى علي حلم مات
نفوس حليمه ونفوس لئيمه
ونفوس بتِدبَل زىّ النبات
والدُّنيا مُولِد وصاحبُه غايب
لا عاد في صُحبَه ولا حبايب
ننام ونصحَى على حَد مات
*****
إنتَ حُر
---------------****
إنتَ حُر
تشوفها سُكَّر
تدوقها مُر
تسيبها ماشيه حياه تمُر
تمشى وراها
تمشي وراك
تعمل لي فيها حُصان يجُر
تشوفها عادى
مابقيتشي فارقَه
سواء بتنفع
سواء تضُر
هوه اختيارَك
تاخُد قرارَك
وإنتَ حُر
*****
لحظة كسوف
-------------------------
ساعات اشوف
لحظة كسوف
لشمس عمرى بتنطفى
حواليّا طوق
وحنين وشوق
وحلم يهرب يختفى
فى قلبى شىء
وف نفسى شىء
وألف شىء بيحَيَّرنى
باحلم واعيش
أصحَى مفيش
يرجع طريقى يتوه منِّى
*****
ليست هناك تعليقات:
إرسال تعليق